عن كل من خان...عن شهداء الاخوان

و ان بعتوا دم شهيد بكرا هتتباعوا ...
مش شماته ف حد و لا بفضل دم علي دم .. كل شهيد من شهداء الاخوان اللي سقطوا امبارح كان من الناس الي وافقت علي الي حصل فالاتحادية و سكت علي اللي حصل  جيكا و الجندي و ابو ضيف و سكت علي اللي حصل ف محزرة بورسعيد التانية و برضو سكت علي دم عماد عفت و علاء عبد الهادي و سكت علي شهداء العسكر  بحجة الاستقرار و سكت برضو علي شهداء عهد #مرسي عشان رئيسكم بيصلي "الاتكبرون"  ... لما تسكت علي الظلم صدقني الدور هيجي عليك. ربنا يرحم شهدائنا  و ينصر الحق...
يسقط حكم المرشد و يسقط كل من خان
يسقط اللي خلي البلد تتقسم و الناس تكره بعض ... يسقط مرسي مبارك

ليل الغياب

العمر يعدي زي الهوا بين السحاب..
والسما بتحلالها نجمه بتلالي فليلة شتاء..
و القمر يسهر يغني و ينور ليلة الفراق...
و  الشمس نورها طالع من بعد ليل الغياب...

ضبطية قضائية

ضبطية قضائية يا عيني يا بهية
بقرار مغفل هتبقي ساديه

ضبطية قضائية يا مصر يا قوية
ظباط و عساكر باعوا القضية

ضبطية قضائية يا ثورة يا ابيه
تلقي جيرانك شايلين بندقية

ضبطية قضائة بحكم الاخوانجية
فمصر هتبقي في حرب اهلية

ضبطية قضائية يا شباب يا ثورية
دمكوا حلال فالإجرائات الحكومية

من سكات

و يجي فراق  يزلزلك و تلملم فقلبك و الحجات..
ودمعه تنزل من عنيك و انت واقف من سكات..
و تقول مش هعزب تاني روحي و الحب بنسبه لي مات..
و تيجي حاجات و تروح حاجات و تفضل فاكر اللي فات..

احلم و انام

بنام كتير و بالايام..
و دايما بحلم فالمنام..
ان الحلم اصبح قريب..
و ان الامل مهوش بعيد..

واصحي الاقي الحلم راح..
و قلبي يشبع مالجراح..
و افرق زعلي عالبشر..
ضحك و كلام ف ليلة سهر..

و ابكي بس بدون دموع..
علي حلم ضاع مفيهوش رجوع..
و آجي اقول.. القي الكلام...
تاه و طعمه فحلقي دام..

وانام تاني و احلم اكتر..
فالحلم بلاقي نفسي بقدر..
اهزم زمان ملوش امان..
و الاقي نفسي فغير مكان...

العدل في وطني

العدل ف وطني مشوفناهوش..
حكامنا عاملين ما بيشوفوش..
سابوا اللي حقه مرجعلهوش..
غيرنا بس فالوشوش..

العدل ف وطني اصبح طرف..
بقينا عايشين ف القرف..
و فيه اللي من دمه صرف..
علي شعب بقي عنده خرف..

العدل ف وطني شئ محال..
لما بيلوموا اللي قال..
البلد خلاص حالها مال..
و يلجموه بميت لجام..

العدل ف وطني راح بلاش..
زي ضي فنور فلاش..
ضاع الحق خلاص مجاش..
لما خونوا اللي شاف..

اتنين

انا مش انا و عايش كأني اتنين..
واحد بيعرف يفرح و التاني دايما حزين..

واحد مش عارف يشوف الناس غير بوشيين..
و التاني اهبل عبيط يضحك عليه بكلمتين..

واحد خلاص شاف الدنيا علي حقيقتها..
و التاني عنده امل ووخداه الدنيا لعبتها..

و فكل امر الاقيهم ماشيين فاتجاهين..
و لا انا عارف هيودوني علي فين!!

يا رب 2

نور الصبح شقشق فتحت انا الشباك
يمكن حاجات تتغير لما افتح لها الابواب
سمعت صوت عصافير بتسبح التواب
دعيت ليك يا رب ..دا انا مليش سواك

حال الناس

مش كل من كان صاحبك يبقي صاحبك بجد..
في ناس بتبقي غريبه و تلقاها ساعة الجد..

مش كل من معاك يقدر ف يوم ما يخون..
في ناس دا طبعها والطبع غالب مهما يكون..

مش كل من غاب عنك يبقي خسرته خلاص..
في ناس ساعات تنشغل بس جواها اخلاص..

مش كل من قال لك كلمها تصدقها..
في ناس الكدب دا هوايتها و مشغلها..

مش كل من شافك و ضحك يبقي بيضحكلك..
في ناس وشوشها بتترسم وقت ما تحتاجلك..

القلب الاعمي

سيب عقلك يتأكد ان الحب دا شئ يستاهل
و بلاش تتسرع و تنفذ كل شئ قلبك ليه قايل
قلبك بيقلب اصلا اعمي اول ما يشوف حبة حنية
و لولا وجود عقلك يتحكم كان قلبك بقي زي تكية

خليك فاكر

خليك دايماً فاكر ...لكل شئ فالدنيا دي آخر..
فبلاش تتعود علي حاجه ولا تثبت منظر للكادر..
اصل الدنيا دي دايره كبيرة و نهايتك تلاقيها فالاخر...
و اللي فاكر انه بتاعك  يطلع متاخد فالاخر ...

شنطة سفر

و اقفل فسوستة الشنطة ..
و احس بخنقتي فجأه ..
و اسأل نفسي م الخضه..
انا فعلا خلاص ماشيه ؟ ..

مخدتش بالي من الفكره..
و افتكرت ان انا قادره..
ابعد خلاص بعيد عنك..
و مليت انا منك..
بس الحقيقه هدتني..اول ما قفلت فالشنطة

اني رأيت

إني رأيت من بعيد،،
شعب بقي كله عبيد،،
نسي انه كان ف يوم عنيد،،
و عاش حياته مش سعيد ،،

إني رأيت فالمنام،،
جيشنا اللي كان فيوم هُمام،،
لجموه من غير لجام،،
و بقي ظالم ظلم تام،،

إني رأيت علي مرمي البصر،،
شئ يخاف منه البشر،،
حريق بياكل فالشجر،،
و الميدان كله اتهجر،،

إني رأيت فالجوامع،،
خطيب و كان للكل جامع،،
يبجل فاللي ظلمه واقع،،
و قال محدش لينا قامع،،
و كمان مش لاقي اي دافع،،
ننزل و نهتف فالشوارع،،

إني رأيت فالقصور،،
جبان وخاين و عاش يجور،،
ساب الغلابه واقفين طابور،،
وشعر اسود فالقبور،،

إني رأيت الجبناء ،،
بيضربوا فينا بغباء،،
عبيد لمن بالظلم جاء،،
يعملوا له ما يشاء،،

إني رأيت فيكوا الامل،،
تأخدوا القصاص ممن قتل،،
و اللي للحق فيوم اكل،،
علقوا فرقبيه الحبال،،

ابعِد و اقرّب

ابعِد بعيد و لا اقرّب
الاقي نفسي ليكي بهرب
و مهما  اشرّق و لا اغرّب
تفضل شمسك دي دليلي

اشوف كتير و استغرب اكتر
من حب ليكي فالقلب يكبر
مهما القدر يبعدنا اكتر
مين يعوض حبي ليكي

عادي

عادي تكون و سط الناس و لسه وحيد...
و مش عادي تكون لوحدك و مش وحيد...
عادي تعاتب ناس و ما يقدّروش...
و مش عادي اني اعاتبك و متفهمنيش...

الميدان

تلقي الغني و تلقي الفقير...
تلقي اللي تايه فالسنين...
تلقي عيال صغيريين...
كسروا الخوف و الخوافيين...
هتفوا بأعلي صوت و قالوا:الحق راجع لو بعد حين...

حاجه

معروفه عمرها ما بتقف علي حد و لا حاجه..
و فوسط الزحمة يضيع منك كذا حاجه..
و تجري تدوّر علي الحاجه..
و تلقي فالآخر مفيش حاجه..

جرافيتي

معاه شنطه علي ضهره فيها كل الوانه..
يرسم عالحيطان كلام يزلزل بيها سجانه..
و ورقه صغيره فجيبه تلاقي فيها عنوانه..
وطلقة تيجي من بعيد صوتها يرن ف ودانه..
فلحظة قرر الجبان يقتل كل احلامه..

كلب بديع

مش هنسلم ..مش هنبيع..
مش هنسيب الثورة تضيع..
ثورة مصر هنكملها..ولو موتنا كلب بديع..

مش هنبيع زي ماباعوا..
تجار دنيا و دين..
مش هنخون زي ما خانوا..
حتي لو حاربنا سنين..

مش راح نجري فحضن العسكر ..
مش راح نجري نبيع و نأجر..

مش راح ننسا شهدا صحابنا..
ولا راح ننسي دم و نار..
مش هنسيب من تاني حقوقنا..
اللي ما بينا دم و تار..

رصاصه و هتاف

اعزل لكن سلاحي هو صوتي..
و الهتاف يعلي و اعلي انا كمان فصوتي..
راية علم مرفوعه ترهب عسكري ببندقية..
ارمي طوبة يجري يرهب عيل صغير ملوهش ديه...
و اعلي صوتي بالهتاف.. تطلع رصاصه من اللي خاف..
بموتي فاكر ..اننا نضعف ولا نخاف...
اصل محدش فهمه... ان الموت منا يخاف
و ان كل مابيقتلوا .. صوتنا يعلي بالهتاف

الدم

الدم فالشوارع نازل.. يسقي ارض بور..
و الشباب من بيتها طالعه ..عشان تقولك يلا غور..
و اللي مات حي ف قلوبنا ..و هنفضل دايما نثور..
طول ما دولة ظلم حاكمة ..لحد ما نوصل للقبور..

الدايره

حلمك دا ملكك؟...و لا انت اللي ملكه؟!...
سنين تحاول توصل ما طولته ...
و تعيش تعافر و تجري وراه...
تلف فدايره بلا منتهاه...

حكاية ليل

فليل طويل حالك..بسمع حكاويكي...
وازهق فأقول مالك؟!..مفيش غيري يداويكي...
و اسرح و افتكر ايام..و تجري الدمعه ف عيني...
شبنا من قبل الآوان..و لسه حلمي انا فيكي...

سلامٌ

سلامٌ علي من كان فيوم رفيق الدرب و باع...
سلامٌ علي من وقف جنبك فالأوجاع...

سلامٌ علي تراب الشوارع اللي يعرفك...
سلامٌ علي دروب الحياة اللي ما تعرفك...

سلامٌ علي اصحاب شافوا الفرح وياك...
سلامٌ علي من ساب ذكري حلوة معاك...

سلامٌ علي حب التقيته صدفه و ضاع...
سلامٌ علي قلب بيضحك و هو جواه اوجاع...

سلامٌ علي اول كلام قريته...
سلامٌ علي اول كتاب حبيته...

سلامٌ علي كلمه اتقالت و انت محتاجها...
سلامٌ علي دنيا فتحتلك ابوابها...

انا كويس

انا كويس..مفيش حاجه...
و مش زعلان..ولا حاجه...
انا كويس..و كله تمام...
بيع فقلبي..بس قولي بكام...

ديابه

يا شعب ياللي بهرت العالم ف كام يوم...
خليك دايما مصحصح اياك تنام يوم...
في ديابه مستنيه لحظة تغفا عنيك...
يسرقوا مصر و يكبلوا ف ايديك...

يا رب 1

يا رب..فكل شئ لوجودك دليل...
نعمك كتير حوالينا والكل يسأل فين!؟... عبدك ملول للاسف يزهق فغمضة عين...
وإن سأل غيرك مسأله يمشي فالدنيا ظليل...

غربه

تايه فوسط بحور.. معدش ليا دليل...
غربه و انا اختارتها ..مالقتش ليها بديل ...
فين الطريق دلوني .. ينوبكوا فيا ثواب...
عالبر دلوني.. و افتحوا الأبواب...

خان..يخون..اخوان

اللي خان طعنك فحلمك واللي اصعب خونك..
اللي خان حسابه جاي والصبر هينوّلك..
اصبر علي كربك .. وانزل اهتف فالميدان..
تلقي الشمس نورها طالع والقصاص من الجبان ..

الغساله

هحكيلكم حكاية
انا بقالي 30 سنة عندي غساله بيصلحها واحد بس كل شوية الاقيه خربت من حتي تانية، روحت فيوم قلت لا كفاية كده، كده الغسالة مش هتبقي نافعة، فروحت طردت الراجل اللي كان بيصلحها و قلت اجيب واحد بقي يكون فاهم كده و عارف هو بيعمل ايه بس لازم افضل فوق دماغه عشان ميطلعش زي التاني لازم افضل مرقباه.. المهم جالي2 سباكين واحد كده مش عاجني اساسا و التاني اهو احسن الوحشين، قعدت معاه قلتله بس يا عم انا بقالي 30سنه بعاني و عايزه واحد يقف ايدي بايده نرجع الغساله احسن من الاول قالي انتي بس اقفي جنبي و هتبقي ايدي ب ايدك و نرجع الغساله زي الفل.. قلتله ماشي بس بشرط خطوة بخطوة ناخد القرار مع بعض و تفهمني بتعمل كل حاجه ليه.. قالي ماشي.. المهم بدأ يشتغل و انار واقفه براقب الموقف  مع ان فالاول حسيت انه لخمه كده و مش فاهم اوي قولت مش مشكله اهو ايدي بايده و هنعرف نصلح الغساله..و سيبته يشتغل شوية و ايدي بايده و ماشي الحال و روحت اعمل كبايتين شاي، و قلت نشربهم سوا و نفكر هنكمل تصليح ازاي.. قعدنا و شربنا الشاي و اتفقنا علي كل حاجه و رحت ارجع الكبايات المطبخ. لقيت الراجل بيعمل حاجة متفقناش عليها.. رحت خبطله عالغساله يا عم ايه اللي انت بتعمله ده ركز شوية مش دا اتفاقنا.. يقولي بس انتي ايش فهمك و مكمل، شوية و الاقية بيفكك فالغساله.. خبطت تاني.. يا عم ايه اللي بتهببه ده.. قالي بقولك ايه اطلعي بره و ملكيش دعوه.. يا عم مش دا اتفاقنا و دي غسالتي و عايزاها تشتغل تاني .. يقولي ملكيش دعوه
فجأة لقيت بقي الصنايعيه بتوعه داخلين عليا البيت و بيزقوا الباب و بالقوة هتسيبي المعلم يشتغل.. كلمتهم بهداوة قلتله يا ابني انت و هو انا مش اخترت المعلم بتاعك فالاول و قلت هساعده يصلح الغساله قالي اه، قلتله طيب بس لما الاقيه بقي بيخربها اكتر مش بيصلحها المفروض انبهه و لا اقف اتفرج.. راح مزعق ف وشي و زقني و قالي ملكيش دعوه سيبي المعلم يخلص للاخر و بعدين حاسبيه.. قلتله ازاي بس افرض خربها خالص ما هي باينه اهي .. قالي ملكيش دعوه سيبيه برضو..
العقل بقي يقول اسيبه و انا شايفاه بيخربها و لا اطرده و اجيب واحد تاني يكون كلامه كلام رجاله!؟

لعبة العسكر

العسكر لعبها صح
المجلس العسكري مكنش عايز يسلم السلطه للمدنين و كان كل شوية يأجل ميعاد تسليم السلطة لحد ماقال هنسلمها في مارس 2013 .. فطبعا كان بيحصل مظاهرات و اعتصامات بتنادي بدستور و بتسليم السلطة .جرب معانا كل حاجه بقي :سحل، قتل، تعرية، كشوف عذرية،محاكمات عسكرية، اتهامات بالعماله و البلطجة.. و لقي برضو مفيش فايده.. راح قال خلاص خدوا يا حلوين السلطه العبوا بيها شوية و عمل صفقه مع الاخوان علي ان يسلموهم السلطة و يبقي في خروج آمن لطنطاوي و عنان.. طبعا عشان الاخوان كلاب سلطه جريوا علي الصفقه و عقدوها مع العسكر.. بس العسكر مش غبي كان واثق و عارف ان حكم الاخوان مش هيعجبنا و ان الاخوان مش هيحققوا مطالب الثورة و ان احنا زي ما مسكتناش للعسكر مش هنسكت للاخوان بس برضوا عارف ان الاخوان مش هيسيبوها بالساهل ف هنضطر ان نلجأ للجيش عشان نخلص من الاخوان .. و نرجع للحلقه المفرغه من تاني ... بس الجيش لعبها صح

ولد و بنت

ولد و بنت بنور الصبح متونسين...
احلامهم قد الكون و مستسلمين...
وقلب صغير مرسوم علي ورقه...
و حبة هوا يجوا يطيروه...

ورق كوتشينه

الشايب عاير الولد .. قاله انا بشنبات ...
السنيورة املكها وورق السمبوكسات...
الولد قام و انتفض..قاله زمنك فات...
الحكم ليا انا ..راحت علي الشنبات...

الشايب لاعب الولد.. و اللعب ع الكرسي...
شد الحصان الولد.. جري يلحق الكرسي...
الشايب رفع سيفه.. و ضهره محدش سند...
وقفوا ورا الولد ... هارت و كاروه و اّسات...
قاله الولد باعوك.. و هناخد الكرسي...

كرسي الحكم ملكنا ..و ان طالنا سيافك...
يجي ورق بعدنا..يسجن فسجانك...

الحب

بالحب .. القلب فيوم اغتوي...
و لا طال حبه فيوم .. و لا ارتوي ...
و تكوي فالقلب.. نار الهوي...
و ان جه فيوم الحب انتهي ...
تيجي الليالي تفكره باللي اتنسي ...

فالأصل

فالأصل الانسان كان شئ قوي...
جت هموم الحياة و هدته اوي...
ترس الحياو بيلف و يشد ف حباله...
و الحبل فالأنسان مربوط علي رقبته...

انسان

الدنيا يا انسان مخلوقه مش ملكك...
يملكها رب الكون...ورب الحياة مالكك...
تنسي ظلمك يوم ... و الرب مش نسّاي ...
يمهل عبيده الوقت ... و لا يهمل فيوم انسان...

ولايات متحده

ولايات و متحده.. علي قفانا تعييش..
حكامنا قدامها ..واقفه ومرتعشه...
قوت الغلابه سرقوه.. و مافيش..
واحد فيوم صدهم بأيادي متحده ..

يا مصر

يا مصر حلمي فيكي ما يحققوش عسكر..
و لا خاين يسرقك و لا حتي شيخ منصر..
حكمك فيوم هيكون .. لشعب نصفك يوم..
و لا يحكمك مجنون يهدننا بالخنصر..

سلام يا صاحبي

سلام  يا صاحبي..وبعد السلام لقاء
فرقتنا الدنيا و لعبتها  بذكاء
مين قالك اللي بيبعد يوم ..ينسي حياه فاتت .. دا يبقي يا صاحبي غباء

سلام يا صاحبي..و يبقي بينا لقاء
عيشنا سنين و احنا لبعض دواء
من غدر ايامنا و غدر حبة ناس
سرقوا فأحلامنا..دوقنا سوا من الكاس

سلام يا صاحبي.. و خليني ع البال
كنا سوا لما حال الدنيا مال
و ان نصفتنا الدنيا فيوم من الايام .. العهد ندوقها سوا " الحلوه و المره"

سلام يا صاحبي..